Өндіріспен, тасымалдаумен, дайындаумен және жануарлардан алынатын өнімдер мен шикізатты қайта өңдеумен айналысатын ұйымдардың, сондай-ақ азаматтардың жеке қосалқы шаруашылықтарының шаруашылық қызметі процесінде қоршаған ортаны ластау көздері болып табылатын, инфекциялық аурулардың таралуына ықпал ететін және халық пен ауыл шаруашылығы жануарларының денсаулығына нақты қауіп төндіретін биологиялық қалдықтардың айтарлықтай көп мөлшері түзіледі.

Биологиялық қалдықтарға жануарлар мен құстардың өлекселері, түсік тасталған және өлі туылған ұрықтар, ветеринариялық конфискаттар (ет, балық, жануарлардан алынатын басқа да өнімдер), жануарлардан алынатын азық-түліктік және азық-түліктік емес шикізатты қайта өңдеу кезінде алынатын басқа да қалдықтар жатады. Жануарлар өлекселерін уақтылы жинау және оларды кәдеге жаратудың тиімді тәсілдері жануарлардың жұқпалы ауруларының алдын алуда маңызды мәнге ие.

Инфекциялардан өлген жануарлардың өлекселері мен мүшелерінде патогендік микроорганизмдер өте ұзақ уақыт бойы сақталады. Сондықтан жануардың өлексесі жұқпалы аурулардың берілу көзі болуы мүмкін. Жануарлардың иелері жануар өлген, түсік тасталған немесе өлі туылған ұрық табылған сәттен бастап бір тәуліктен аспайтын мерзімде бұл туралы ветеринариялық маманға хабарлауға міндетті, ол тексеру нәтижелері бойынша дәл сол жерде биологиялық қалдықтарды кәдеге жарату немесе жою тәртібін анықтайды.

Биологиялық қалдықтарды қайта өңдеу немесе көму (өртеу) үшін жеткізу міндеті шаруашылық иесіне жүктеледі. Биологиялық қалдықтарды кәдеге жарату нұсқаларының бірі мал қорымы (биотермиялық шұңқырлар) болып табылады. Мал қорымы (биотермиялық шұңқыр) – санитарлық-қорғау аймағын сақтай отырып орналасқан, жануарлардың өлекселерін залалсыздандыруға арналған құрылыс. Биологиялық қалдықтарды жерге көму, су айдындарына, тұрмыстық қоқыс контейнерлеріне тастау, қалдықтарды көмуге арналған полигондарға шығару жолымен жоюға қатаң тыйым салынады.

Құрметті ауыл шаруашылығы тауарын өндірушілер, жануарлардың өлімі мен ауруларының барлық жағдайлары туралы ветеринариялық мамандарға хабарлау қажет.